One Rupee Wedding: ஒரு ரூபாய்க்கு ஓஹோன்னு திருமணம்!!!

image_pdfimage_print

‘மை கிரேண்ட் வெட்டிங்’ என்ற திருமண ஏற்பாட்டாளர்கள், வறுமைக் கோட்டிற்குக் கீழுள்ள குடும்பத்திற்கு ஒரு ரூபாயில் ஆடம்பர திருமணம் செய்து வைக்கின்றனர்.

சென்னையை சேர்ந்த ‘மை கிரேண்ட் வெட்டிங்’ என்ற திருமண ஏற்பாட்டாளர்கள், வறுமைக் கோட்டிற்குக் கீழுள்ள குடும்பத்திற்கு ஒரு ரூபாயில் ஆடம்பர திருமணம் செய்து வைக்கின்றனர்.

திருமணம் என்பது, ஒருவரின் வாழ்வில் மறக்க முடியாத தினமாகும். அந்த தினத்தை மறக்க முடியாத நாளாக மாற்றுபவர்கள் ‘Wedding Planners’ எனப்படும் திருமண ஏற்பாட்டாளர்கள். திருமணத்தை வித்தியாசமாகவும், பிரம்மாண்டமாகவும் நடத்த வேண்டும் என அனைவருக்கும் ஆசை இருக்கும். ஆனால், வசதி படைத்தவர்களுக்கு மட்டுமே அந்த ஆசை நிறைவேறுகிறது.

ஏனென்றால், ஒரு திருமணத்தை நடத்துவதற்கு குறைந்தபட்சம் ரூ.1 லட்சமாவது வேண்டும். அதிலும், அதை வித்தியாசமாகவும் ஆடம்பரமாகவும் நடத்த ஏறக்குறைய ரூ.3.5 லட்சத்திலிருந்து ரூ.7லட்சம் வரை ஆகும். தங்கள் அன்றாட வாழ்க்கை தேவைகளுக்கே போராடும் ஏழை மக்களுக்கு,இந்த ஆடம்பரத் திருமணம் என்பது கனவாகவே அமைகிறது.

இப்படி இருக்கையில், ஆடம்பரத் திருமணம் செய்ய விரும்பும் ஏழைகளுக்கு உதவும் வகையில், சென்னை ஓஎம்ஆரைச் சேர்ந்த திருமண ஏற்பாட்டாளர்களான ‘மை கிரேண்ட் வெட்டிங்’ (My Grand Wedding) ஒரு ரூபாயில் ஆடம்பரத் திருமணத்தை நடத்தித் தருவதாக கூறியுள்ளனர்.

இதுகுறித்து சமயம் தமிழுக்குப் பேட்டியளித்த ‘மை கிரேண்ட் வெட்டிங்’ நிறுவனத்தின் முதன்மை செயல் அதிகாரியும், அதன் நிறுவனருமான சரத், “இது ஏழை மக்களுக்காக நடத்தப்படும் ஒரு முயற்சி. வரும் டிசம்பர் மாதம் முதல் இந்தத் திட்டத்தை செயல்படுத்த உள்ளோம். இப்போது வரை சுமார் 25 ஜோடிகள் இதற்காக விண்ணப்பித்துள்ளனர்”, என தெரிவித்துள்ளார்.

மேலும் எங்களின் கேள்விகளுக்குப் பதிலளித்த அவர், “சாதாரணமாக ஒரு ஆடம்பரத் திருமணத்தைச் செய்ய ஏறக்குறைய 3.5 லட்சம் ரூபாய் தேவைப்படும். ஆனால், இந்த திட்டத்தின் மூலம் மாதம் ஒருமுறை ஒரு ஏழைக் குடும்பத்திற்கு வெறும் 1 ரூபாயில் ஆடம்பரத் திருமணம் நடத்தத் திட்டமிட்டுள்ளோம்.

ஏழை ஜோடிகளைக் கண்டறிய எங்கள் நிறுவனத்தின் சார்பில் 4 பேர் கொண்ட கமிட்டி அமைக்கப்பட்டுள்ளது. அவர்கள், பெறும் விண்ணப்பங்களில் உள்ள தகவல்களை ஆய்வு செய்து, ஜோடிகளின் பொருளாதார நிலையை அறிந்த பின்னரே, திருமணத்திற்கான ஜோடியைத் தேர்வு செய்வோம்.

இதில் தேர்வு செய்யப்படும் ஜோடிகளில், மணமகன் அல்லது மணமகள் இவர்களில் ஒருவர் கண்டிப்பாக வேலைக்கு செல்பவராக இருக்க வேண்டும். ஒரு குடும்பத்தை நடத்தும் அளவிற்கு அந்த ஜோடி இருந்தால் மட்டுமே, அவர்களுக்குத் திருமணம் செய்து வைக்கப்படும். மேலும், இரு வீட்டாரின் சம்மதமும் இருந்தால் மட்டுமே திருமணம் செய்து வைக்கப்படும்.

இந்தத் திருமணங்கள், ஓஎம்ஆரில் உள்ள ‘வெட்டிங் ஸ்ட்ரீட்’ இல் உள்ள ஹாலில் நடத்தப்படும். திருமண ஜோடியின் மத வழக்கப்படி, இந்துவாக இருந்தால் பூசாரி, பூஜை, கிறிஸ்துவாக இருந்தால், பாதிரியார் தலைமையில், முஸ்லிமாக இருந்தால் அவர்களின் வழக்கப்படி திருமணம் நடத்தி வைப்போம்.

இந்தத் திருமணத்திற்கு 50-100 விருந்தினர்கள் வரை இருக்கலாம். அவர்களுக்கு காலை உணவை நாங்களே வழங்குகிறோம். அலங்கரிக்கப்பட்ட ரிக்ஷா அல்லது பல்லக்கு என திருமண ஜோடிகள் எதில் வர விரும்புகிறார்களோ அதில் வரலாம். திருமணத்திற்குப் பின் இரு வீட்டாரையும் காரில் ஏற்றி, நாங்களே வீட்டில் விட்டுவிடுவோம். அப்போது, அவர்களுக்கு பிரத்யேக திருமணப் பரிசும் வழங்கப்படும். இதுமட்டுமின்றி, திருமணத்தில் புகைப்படம், வீடியோ அனைத்தும் எங்கள் செலவிலேயே செய்து தருகிறோம்,” என தெரிவித்துள்ளார்.